Subject | (ديوان غزليات) لشاعر الحب |
From | هنري14 |
Sent | Friday, April 16, 2010 11:04 AM |
لاموني اعله ضيمي ..
المادروا بالضيم ..
واني لخاطرك ..
ما انطي بسرارك
وحسدوني عليك ........
واني كلي اجروح ..
ومتحمل لعينك ..
وجع بسمارك
لو بالخافي يدري اليعتب اعله الروح
چان ابعينه شاف ....
ابگلبي آثارك
تحملتك جرح .....
والون ، أون بسكوت ..
وفوگ الجرح هسه
اتطالب ابثارك !!؟
هاك الروح بيدك ..
وانت حر شتريد ..
سوي اللي تحسه ..
ايطفي الك نارك
معذور اني اعذرك ..
لأن گلبي وياك ..
خطوة .. بخطوة يمشي
ويعرف اخبارك
خطار آنه روحي .. واجت يمك ضيف ..
ماظن شيمتك تغدر بخطارك !!
تعرفني انت زين ..
وأكثر من الناس ..
احط روحي سعف ..
بس احمي جمارك
سوي اللي تريده ..
اشضل بعد بالروح ؟
مو روحي رهينه وباقية بدارك
تزعلني ، واحبك ، وانتشي بطرواك
وروحي اتذوب لهفه ..
امنسمع اشعارك
يا كلشي انت عندي
وكلشي انت وياي
عاين على جروحي ويكفي اعذارك
مو تدري الوصية
اتلوح .. سابع جار ...؟؟
يا جيران گلبي
شبيك وي جارك ..؟؟
________________________________
اذا ماحبچ انتي ..
اشلون احب الناس ..؟؟
يا أول غرام بصغري .. وبكبري
وإذا ماشوفچ انتي ..
اشلون اشوف الناس ...؟؟
وآنه ابغير شوفچ بي قصر نظري !!
حبيتچ سهر ..
وايامي غابة ليل ..
وبس وياچ اسهر
يابعد عمري
اذا مو ألچ اكتب ..
ما احس بالشوگ ..
وآنه العله مودچ .. اكتب ابشعري
جربتچ اهواي ..
وشفتچ اوفى الناس ..
يا أول حبيبة اتحملت قهري
أسأليني ...
ابحياتي اشگد تمر نسوان ؟؟
ليش انتي الوحيدة ..
الباقية ابفكري ..؟؟
وأسأليني ..
ابحياتي اشبيها من اهموم
ليش آنه من اشوفچ ..
يطفه كل جمري ..؟؟
يا أجمل محطة ..
البيها گلبي ارتاح
يانهر الحنان .. وبالگلب يجري ...
تغفه أعيون ياما ..
وياما ، نامت ناس
وآنه ويه الاشواگ .. وملتهي ابسهري
اقرب من اشوفچ ..
واحترك مرات ..
احس من بعيدة ..
ويختنگ صدري
ويمر طيفچ هوى ..
واحتار اشمه امنين
وشكو احلى يعمري
من الهوى العذري ؟؟
وتسأليني احبچ ....؟؟؟
اي نعم والله
بس ليش آنه احبچ ... ؟
صدگي ما ادري ..!!
_________________________
اشضل من ذكرياتك ..
كلشي ما موجود ..
صار اسنين .. ما ضلت ولا ذكرى
تصاويرك عفتهن من اخذني الروج
اوازاني الوكت ..
والوكت شيگدره ..؟
عافت ناس كلشي ..
الدنيا صارت نار ..
زلمه الزين بيها ..
اليسلم ابعمره
حتى الليل .. هذا الليل ..
من اتوازه .. اجت مرات ..
عاف انجومه كلها .. اودع الگمره ..
وتسأل ذكرياتك ..؟
عمري راد ايروح ..!!
لو انت بمكاني ..
اتعوف ابو الذكرى
نسيتك ....؟؟
لا .. نسيت اسمي !
واصحابي .. واهلي بالمره
هو الموت وحده اگبالي ظل بالليل ..
وافكر ما اجت ابراسي
بس فكره ..
اعوف الروح ..
هو اللي يصير ايصير ...!!
يم ربك عفتها ، اطلعت بالقدره ..!
أنه مبلل جبتها ..
من الصغر لليوم .. والمبلل ..
تظن اتخوفه المطره ..؟؟
وتسأل ذكرياتك .. ؟
مدري راحن وين ..
رماد ونار صارن بيهن شتقره ؟؟
لا تعتب .. اعتابك عندي مامسموح
ولترجعلي ماضي ..
ايامه مطشره
لو انت ابمكاني
اتعوف اغلى الناس ..
لأن ساعتها ..
كل الناس تتبره
هذا اللي جرالي ..
لهسه افكر بيه ..
مدري اشلون طلعت سالمه الجره ..!!
____________________________
كل يوم من ينتهي ..
وياه اشطب رقم ..
والرقم من عمري ..
ويوميه اگول انتهت ..
والعمر يركض ، ركض
بس چن ولا ندري ..
شبسرعه وتغيرت ..؟
شو صرت مثل الگطن ..
وك ليش ياشعري ؟؟
وكل يوم من ينتهي ..
ينطيني اجري تعب ..!
اشگد جمعت بالتعب ..
حتى انحنى ظهري ..!
الدنيا اسيوف بظلــوعي
.. سنتها
وقوانين التعب لجلـــــي .. سنتها
الوادم تحتفل بآخــــــــر .. سنتها
وأنه ابجي اعله العمر راح منديه
وكل يوم من ينتهي ..
ياخذ اشما بالگلب ..
من حيل .. من فرحه
ومسكين ليلي يمر ..
مستعجل اعله الفجر ..
ويعاين لصبحه
لا ياعمر .. والجرح .. ربيته من الزغر ..
ياهو اللي مثلي گبل يتربه وي جرحه .. ؟
الگلب ضل بس اهو وحـــده
.. ورباه
يتيم وما لگه واحــــــــــــــد .. ورباه
منو المثلي أخ جرحــــــــــه .. ورباه
وكبرنه اعله القهر احنه سويه
ويوميه اشطب رقم ..
متعود آنه اصبحت ..
والرقم من عمري
ومابيه ظنه العمر ..
كاغد وجاسه اللهب .. مگرود ياعمري
ما مرني مره الفرح ..
بس قهر جبت العمر ..
من زغري حد كبري
وآنه ويه روحي عرك ..
كلساع اگلها الصبر ..
ياروح وچ صبري
الوادم تنظر لجسمــــــي
.. يروحاي
وأنه اموتاتني سكتــــــه .. يروحاي
ليش وبالعجل طحتـــــــي .. يروحاي
خلص صبرچ يروحي وخنتي بيه
ياعمر ..
شتريد مني بعد
هو شبقى بالروح
وياكتر من الگلب ..
ضل صاحي ما مجروح
تحسب ايامك عليَّ ..؟؟
وك عمري ماينحسب ..
لن خلص نوح ابنوح
واتقشمر ويه الوكت ..
يومية اودع محب ..
ياهو الاحبه ايروح ..
____________________
عوفيني ..
انا اترجاچ عوفيني ..
نار الگلب صاير ..
والزمن حطاب ..
بالهم جبت عمري ..
وناري ما تخمد ..
انا اترجاچ عوفيني ..
معارك انا اوكتي ..
والوكت مغرور ..
على بيبان صبري ..
ابزوده يتهدد ..
گلت وياچ بلكي الگه محطة ..
اتريحني وارتاح ..
بلكي العين تغفه ..
ويمچ اتمدد ..
لگيتچ نار انتي ..
وآنه صاير نار ..
وانطبگن علي نارين ..
يمته ابرد ..؟؟
عوفيني .. عوفيني ..
انه اترجاچ عوفيني ..
شنو اليغريچ بيه ؟
وباقيه انتي وياي
حسبالچ گبل من چنت انا محمد ..؟؟!!
كتله قهر هسه ..
وتمشي فوگ الگاع ..
وگمت من روحي ..
بعض احيان اتشرد ..
وعوفيني ..
انا اترجاچ عوفيني ..
خلص دفتر حياتي ..
وبي قصص اشكال ..
وايامي قهر .. وهموم بيهه اشگد ؟
عليچ آنه انقهر ..
واهواي احسب بيچ ..
لأن دمعچ وياي ..
ايزرف اكبر خد ..
اذا گتلچ احبچ .. آنه مو چذاب ..
احبچ انتي مثل الروح
لا .. ازود
بس المشكلة ..
من آنه افكر بيچ ..
ما الگه الحلول ..
الاعتبرهن حد ..
چنتي ام الفرح ..
وعيونچ ام النوم ..
ذبلتچ على ايدي ..
او وردچ اتمرد ..
جنيت آنه عليچ ..
واعترف بالصار ..
بس الزمن ..
هو وياي يتعمد ..
عوفيني ..
بعد عندچ دمع ..
بالعين لا تبچيه ..
وعندچ حيل عالهم ..
آنه حيلي انهد ..
عوفيني ..
تره وياي ..
دمعچ ينتهي ..
وبعدين ..
تبچين العيون ..
وكلها بيچ تلوم ..
شوفي ..
شوفي شفادچ محمد
______________________
العود من يحترگ ..
يبچي بدمع سكته ..
بس يچوي من ينلزم ..
دمعاته ساندته ..
وياك .. لا يازمن ..
ترست جود الصبر ..
بس انت شگگته ..
گالولي لتأمنه ..
غدار طبع الوكت ..
حسدوني گلت وحچوا ..
مو آني جربته ..
وجازفت انا ابعشرتك ..
ذيب ولگاله بشر ..
ما واحد ايأمنه ..
بس آني امنته ..
عديت ربع الدرب ..
واضحك واگولن جزت ..
والدرب خلصته ..
وعديت نصف الدرب ..
خوفني گلت ابشقه ..
وصدگوني ما خفته ..
ومشيت وآنه بثقة ..
خاويته وتأكدت ..
لا عافني انص درب ..
ولا بالثلث عفته ..
ومسد على دفتي ..
أمني من الخطر ..
گال اطمأن انته ..
وگبل النهاية بشبر ..
حومر اعيونه علي ..
غلست گلت گلت انتهت ..
چني ولاشفته ..
شفته ابتسملي افرحت ..
بس دگها بيه واسف ..
عضيت اصبع ندم ..
ليش آني رافگته
__________________
محتاج اريح الگلب ..
ومحتاج اريح العين ..
وابچي اعله كيفي صدگ ..
كون واوفي الدين ..
مطلوب ياما دمع .. دمع اعله امي المشت ..
ودمع اعله ابويه المشة ..
ومعي اعله عمري الگضة ..
وما ادري خلص وين ..
يا ثگل هم الگلب ..
خازن اهمومي عمر ..
مو كافي .. مو كافي صار سنين ..
ويا عين صرتي بحر ..
والموج بيچ ارتفع ..
خايف ولچ تعمين ..
محتاجه انتي البچي ..
وما يضر دوم الدمع .. مراته كلش زين ..
ومحتاج اريح الگلب ..
ومحتاج ون اسمع ..
لن شفت ماضل خوي ..
ولا صاحب الينفع ..
الدنيا مو بس جني ..
هم تنتهي لو بقت ..
هالناس ما تزرع ..
چانت الخوه گبل ..
تمشي بشعار الورد ..
ازرع ولا تقطع ..
بس للأسف شو صفت ..
خوتنه هذا الوكت ..
اقطع ولا تزرع ..
يا گلبي هاي البشر
مو كلها صدگ سوه ..
اشكال وك يا گلب .. كلسع شكل يطلع ..
وعفيه عليك الصبر ..
يا گلبي لا تجزع ..
طماع هذا الوكت ..
وشچ بشر يا گلب ..
مثل الوكت يطمع ..
الجمر هو جمر .. بالثلج خله اثر ..
لتگلي ما يلسع ..
يوسف بهذا الوكت ..
خواني گطعوا صدگ ..
بس الله ما يگطع
_______________________
انا الصابر .. صبر عاگول بالبيد ..
من يعطش ..
رمل بشفايفه ايضوگ ..
وآنه عاشور ..
ما يتصافه وي عيد ..
حتى ابضحكتي ..
بالعبرة مخنوگ ..
طحت ..
عود اخوتي ..
هدوا هواديد ..
اشو ردوا عليه ..
وآني مطگوگ ..
گمت مجبور اشاگف ..
وآني بس ايد ..
شصد بأيد وحده ..؟
وهي راشوگ ..؟
اتلاوه وياي حظي ..
ملاوه عربيد ..
سبع والله ورفعته ..
وشلته ليفوگ ..
ماطخ النخل راسه لصواعيد ..
اليريد الرطب .. يصعد للعثوگ ..
ماطخ راسي لحد ..
مثل ميريد ..
ولاگل للحرامي ..
ابراحتك بوگ ..
آني الچنت اكد اعله الكواديد ..
وانه امزامط طحت ..
واجناحي مشبوگ ..
لجل هاي الوكت ..
هددني تهديد ..
وشلع گلبي شلع شجره ..
من العروگ ..
الف وسفه ..
طحت وآني الچنت حيد ..
وطلعت اگبال شامت ..
ثوبي مشگوگ ..
العين اتخون ..
آنه مجرب اعيوني ..
مرات الحلو ..
متشوفه كلش زين ..
وسمعي ايخون ..
من يسمع حچي بلا شوف ..
ميفرزن حچي الحلوات .. والحلوين ..
بس جربت گلبي ..
من يحب ايذوب ..
ويرف للي يحبه ..
بلهفة امعرسين ..
يا حلوة وحلاتچ ..
عافية واشواگ ..
رف گلبي عليچ ..
وانتي ماتدرين ..
يا تفاحة آدم ..
يمته گلبي ايهيد ..؟؟
وانتي الجنه يمچ ..
واحنه بالنارين ..
مو بيدي مجبور ..
اظن ربچ عذر ..
كل ناس مجبورين ..
يل عينچ جزيرة ..
والرموش اسيوف ..
كتلتيني يحلوة ..
ابچي عالميتين ..
فرق بين اليحب ..
وما تحرگه النار ..
وفرق بين اليذوب ..
ابهمسه من تحچين ..
يا ماي الاريده ..
واشتريه بالروح ..
وانتي النهر يمچ ..
واحنه عطشانين ..
يل شوفچ عوافي ..
الگلب راح ايموت ..
عجب من ردت شوفچ ..
گمتي تتعذرين ..
ماجبرچ يحلوة ..
القسمه تلعب دور ..
ما مقسومة اليه بكيفچ تحبين ..
خليني آنه وحدي ..
الحظ شگول عليه ؟
ادوره بيا مدينه ؟
وحظي گاعد وين ؟
خجلان آني من روحي ..
وحملت النار ..
واتوازت اشواگي ..
ابزحمة الماشين ..
خلصت العمر ..
شجرة أورق صفصاف ..
يا صفصاف عمري ..
شوكت تصبح تين ؟؟
ما حس اخطأت ..
لمن كشفت النار ..
ردتچ على ناري ..
وجمري تتحمين
___________________
كون بگلبي تدري اشيحمل اسرار ..
وكونك تفهم بنظرات العيون ..
ليش آنه من اشوفك اشتعل نار ..
گوم الحگ عليه وشوفني شلون ..
احبك .. وآنه باقي وياك محتار ..
شفت اعيونك آنه .. وصابني اجنون ..
ولك گلبي گلب .. مو كومة احجار ..
ومن حقي آنه اگلك .. بيك مفتون ..
بارد لشوكت .. مره انگلب حار ..
وچويني واگلك آني ممنــــــــــــون ..
امبين عليك الهوى ..
ومعروف احساسك ..
وشبيك شو مرتبك ؟
من جدمك لراسك ..
فضفض اشما بالگلب ..
واحچيلي ما عندك ..
ولتخلي ماي الخجل ..
يطفح على خدك ..
بعيونك انت الحچي ..
وبعيونك انت اسرار ..
واشبيك من تلزم ؟؟
شو تچوي مثل النار ..
واضح عليك العشگ ..
لا تخفي انت الصار ..
احچيلي آنه اسمعك ..
لتخاف من كلشي ..
هو العمر منگضي ..
وبسرعة من يمشي ..
بس راح اريحك انه ..
وانطيك البگلبك ..
آني احب اجيتك ..
واعرف مدى حبك ..
__________________________-
بشر انتي وبشر آنه ..
ونفس الاحساس اللي عندچ ..
عندي أنه ..
بس فرق من امشي .. خطوة خايفين ..
وانتي خطواتچ من الله امرهدنه ..
وفرق حتى الضحكة ..
من عندچ هدوء ..
وآني ضحكة شفتي ..
چنهه امسودنه ..
وفرق عمرچ .. يصغر ابعكس السنين ..
وآنه كل اليوم اليمر اكبر سنه ..
وإذا انت شهر .. متهزك اشواگ ..
آنه ساعه .. واظل ابچي من الفراگ ..
لأن آني احبك ..
كلشي ضحيت ..
بعت روحي وحلالي ..
بيع محتاج ..
ردت بس كون احس ..
وياك كفيت ..
بس اعذرني ..
ما سدن تره اوياك ..
وبعتك على مودك من توازيت ..
إلمن جاي ..؟
مو خلصن ايام السود ..
عفتني لوحدي ..
اتلاوه ويه الموت ..
عركه والزمن هادود ..
إلمن جاي ..
خلصت .. الله چان وياي ..
ما مترجي جيتك ..
تنفض البارود ..
ما هزك حنينك ..
وآنه جوه الموت ..
اتنطر الرحمه ..
ابچيله الصايود ..
ولا هزك حنينك ..
وآنه بيه النار ..
واتنخه آنه بيك ..
وانت ما موجود ..
حسبالك الدنيا ..
التمشي بينه اسنين ..
ماترجع ابلحظه ..
وكلشي بيهه ايعود ..؟
كون ايعود ..
كون ايرد زماني ..
وذاك ابوي ايعود ..
چا شاف المروه ..
البعده شحت ليش ..؟
مو وصانه بيهه ..
وحط علينه اشهود ..
اظنك چنت ما موجود ..
لو موجود ..
چا حسبت بيه ..
وگلت هذا حمود ..
ولو موجود ..
چا فكيت حزن الظلن من اسنين ..
ما ذبن اهدوم السود ..
ولو موجود .. تتمدد گبلنه
اعله المنايا امدود ..
بس معذور .. ومن وصانه ابونه ..
انت ما موجود ..
________________________
يالزارع صبر ..
بأيامك الوكحات ..
يالذبلت عمرك ..
ورگةٍ ورگة ..
بخيت وثوب صبرك ..
ما نزعته ابيوم ..
وادري الوكت منك ..
رايد ايشگه ..
گالوا ننسى رسمك ..
من تمر الايام ..
طبع ينسى البشر ..
لو طالت الفرگة ..
بس بوية وحياتك ..
صورتك للحين ..
وسط الروح صدّگ ..
هيه متعلگة ..
يمتعب الزمن ..
من اجل ضحكة بيت ..
وين المثل گلبك ..
هسه ما نلگه ..
وندور وين .. مثلك ..؟
مو هذيچ الناس ..
صفه هسه الحرامي ..
يطالب بحگه ..
وندور وين مثلك ..
عنده گلب اچبير ..
يبث بينه الحنان ..
ابساعه الحرگه ..
ما نلگه احنه مثلك ..
يا وسيع البال ..
ضلينا ابغيابك ..
روح مختنگه ..
گبل لمن نجيك ..
ابشبگتك نرتاح ..
اجيناك احنه هسه ..
ابعازة الشبگه ..
طالت غيبتك ..
مر مرة لو بالطيف ..
مر بينه ..
ترانه ابحاجة اطيوفك ..
ندري ابصحوه ماظن تلتگيك العين ..
امبارك بالحلم ..
خل عيننا اتشوفك ..
علمنه الزمن ..
نصبر .. نعوف اهواي ..
بس كلشي نعوفه ..
وانت منعوفك ..
يا شايل جمر ..
جبت العمر تعبان ..
ومن تفتح اديك ..
الخير بچفوفك ..
يا بويه اعله بختك ..
هالگلب محتام ..
بعدنه اصغار بوية ..
ونرجه معروفك ..
گبل تتلگه ضيفك ..
بالهله من الباب ..
هسه الگبر ..
هم بي باب لضيوفك
___________________
اسكتهن ويبچن ..
والدموع الوان ..
عيوني وعالبواچي ..
مالهن ثاني ..
شلت بيدي الجمر ..
والحرگة احس بالروح ..
ولا گلت لشماته ..
الجمر چواني ..
اطحن قهر والهم ياكل ويه الروح ..
منشوفن ذكرياتك ..
فوگ حيطاني ..
عفتني ابليل وحدي ..
والطريق طويل ..
تيهتك ..
وجرحي اعليك دلاني ..!!
ماعوفك چذب ..
والگالك چذاب ..
ولا تگدر حبيبي بيوم ..
تنساني ..
من تضحك ..
تردك ضحكتك للشوگ ..
ومن تحزن ..
تشوف ابعينك احزاني ..
اسرارك ابگلبي ..
وما بحت فد يوم ..
ولا گدروا عليه ..
وباگوا لساني ..
ضميتك جرح ..
واتچه عالاحاه ..
وامكابر ضحكت ..
اگبال عدواني ..
من تيهت روحي ورادوا يدورون ..
اجو يمك ..
لأنك انت عنواني ..
فرغت سلتي ..
وماظل اليه متاع ..
ما حنيت .. وانته ابوسط بستاني ..
حاطتني السيوف .. ويمي صار الموت ..
وانت ابعيد گاعد ..
گلي شمتاني ؟؟
ما ظن قصرت ..
والعشرة صار اسنين ..
ورهمت اعله بردك ..
طبع نيراني ..
بعدك بالگلب ..
متربع ومرتاح ..
وعطرك لسه اشمه ..
ابين قمصاني ..
يالنايم ..
عيونك ما تمل النوم ..؟
وآنه اعله السهر ..
متعوده اجفاني ..
بدموعي رويتك ..
همي بس تصير ..
عفت زرعي وتركته ..
وذبلت اغصاني ..
سألوني عليك ..
وجاوبت الدموع ..
اسكتهن ..
ولكن غلبن لساني ..
عرفوا كلشي بيه ..
وكشفوا الاسرار ..
لأن حبك لوحدك ..
هو بچاني ..
عشت وياك دنيا ..
ويوم ياكل يوم ..
سجين ابقفص حبك ..
وانت سجاني ..
ابرد ثلج يمك ..
واستر المضموم ..
اخاف اعليك من نيران بركاني ..
دليت الفرح من شفته يمك چان ..
اجت يمي الاحزان .. وهو ماجاني
_________________________
بعيوني باقي حلم ..
وهمومي صارن جبل ..
شيزيحه هذا الجبل ..
شفت الجبل ينهدم ..
شفتچ حمامه أمل ..
طرتي ويه روحي سوه ..
ومنچ عرفت العزم ..
مثلچ ابد ما شفت ..
حلوة وبراءة طفل ..
وعيونچ الهن سحر ..
منها الگمر ينرسم ..
مرن اسنينچ علي ..
وآنه اشبر بهل عمر ..
طوله ويه طول الحلم ..
كل يوم عمرچ يمر ..
يكبر وياي القهر ..
واسهر الوحدي وأعد ..
بالسما .. اشطالع نجم ..
يا ( مروة ) هذا الوكت ..
وياه دخلت ابحرب ..
ويدري انتي نقطه ضعف ..
من عدهه آني انلزم ..
ساومني بيچ الوكت ..
واخسرت آني الحرب ..
وأول حرب بالعمر ..
اعترف بيهه انهزم ..
طحت مره ابهواك وماني ندمان
من يندم على اليعشگ مثالك
وأذا چفك نبع والكون عطشان
وزلال الماي يشرب من زلالك
وأذا فيّك يعادل مية بستان
يانخلة التسد الفيّ بدالك ؟!
يبو عود الحلو ومن الله ريان
شتل شمس بسمه أمعشب شتالك
وأذا ورد الگرنفل بيك هيمان
الملح معذور لو هام ابدلالك!!
يعصرية حديقة وفجر نهران
يخيعونه الغفه ابكوسر خيالك
ويالحظة شعر والليل نعسان
قصيدة وليل واتخيل جمالك ؟؟
ايا كاس الصبر والكاس مليان
فلا يوم الگلب مل واشتكالك
مضن عمرين وأيوبك الى الآن
شباب وبي حسن گد ما حلالك
يناعم ، ياترف ، ياشطب ريحان
اشتهيناك ابعدالك وبميالك
مثل بردة عروس اگبال سكران
وره البردة الخفيفة ايمر خيالك
ومثل حچي الكمان بأيد فنان
بيديه الگلب دگ وحچالك
ومثل بچي الشواطي ابموت نهران
حدر جفني العمر ياما بچالك
ومثل نجمه يتيمه ابليل بردان
العمر ثلّج ولك من شح وصالك
تيهني الگلب من زغري يفلان
من ذبني على حرثة شتالك
لهسه ارضع هواك ابديس الاحزان
ورغم شيبي أنا احتاج لدلالك
يلوموني ابمحبتك عده وصحبان
تلوچ انياب لوم العده اگبالك
وحگ مايك گضيت العمر عطشان
ولا مديت چفي لغير مايك
وحگ نعمة خبزتك ماني جوعان
وبحلگي العسل خبزك وچايك
وإذا مليون ناي ايعزفن الحان
فلا تطرب اجروحي لغير نايك
واذا يوم اسألتني اشلونك افلان
اظل للموت اتباهى ابسؤالك
انا ابگلبي يقين الناس بهتان
واقوى من المؤكد احتمالك
يمن خدك امريع مثل نيسان
وشكو احمر ورد فتح ابجالك
ويمن خلگك امبشر مثل بستان
والگمره بيمينك وابشمالك
واذا سبعين گمره اصطفت الوان
ياهو اليگدر ايطفي احتفالك ؟؟
قدر مكتوب حبك صار يفلان
ولآخر سطر انطر وصالك
واذا عود الطرب يحتاج دوزان
انا مدوزن على نغمة جمالك
يبيبان الفجر يا احلى بيبان
ويفال الخير للغباش فالك
ليست هناك تعليقات:
إرسال تعليق