Subject | احلام الدمع.....للشاعره نور البدر |
From | حيدر الهاشمي |
Sent | Saturday, April 17, 2010 1:13 AM |
جانت أحلامي فقيره
تعيش بين الناس صوره بلاخيال
ومره كبرت حيل كبرت
صارت بروحي يقين
وكمت اسميها المحال
ومرة اكتبها الحقيقة
وعل الورق صارت سؤال ؟؟؟؟
والسؤال ...
يريد مني . أكتب أحروف الجواب أعله الجبين
وعاندت ....
عاندت ويجرني كوه
كتله صعبه أثنيهن صدك محال
أدري أنه اباب عيني
أيعيش جيل من الظلام .
وأنه أدري الصوت
من يصرخ يهزني
ويشتهي وياي الكلام .
وأدري ليل المستحه
يداعيني بيك
وأنهظم مثل الحمامه
المالكت عش الأمان
ويا أمان بلايه جفك
طائفيه وسيف اعمه
بلايه شوف ... يلوج شوكي
وشوكي طفلة توكحت .. من مرها جوع
وما رضت تشرب حنان
وأدري وياك الليالي تفك حزنها
تداعب النسمات وتغمض جفنها
وتغفه وي برد الهوى
المرني بصباي
وآآآآآآآآه
من ذاك الهوى العاشك شتاي
وكلبي بجدام الخجل يسحلني ليك
أهناك يم آخر حلم من القصيده
النامت بجرح القوافي
وهناك
يم آخر وهم من الحقيقة
الماتت بحظن التجافي
ويل ردت تعرف جوابي
راح اكلك
هسه اكلك
فك باب عينيك خلي اشوف
الدمعة طير وظلت اعله الخد
تطوف
الدمعه خرسه بلايه صوت
ومن تسيل الشوك
نهران ويكت فوك الجروف
وأنت تعرف
شنو معناه الدمع فوك الحروف
شنو معناه الدمع فوك الحروف
ليست هناك تعليقات:
إرسال تعليق